2018 წლის 27 ივლისს დავით ტვილდიანის სამედიცინო უნივერსიტეტის კურსდამთავრებულთა გამოსაშვები საღამო კონგრეს ჰოლში ჩატარდა. კურსდამთავრებულებს სიტყვით მიმართეს ამავე უნივერსიტეტის რექტორმა ბნ-მა ლევან ტვილდიანმა და დეკანმა ქლბ. ნინო ბრეგვაძე-თაბაგარმა . ასევე სიტყვით გამოვიდნენ და დამსწრე საზოგადოებას თავისი გამოცდილება გაუზიარეს დტსუ-ს კურსდამთავრებულებმა მარიამ ჯაშმა, ნინო მიქაბერიძემ და ნანა ჯინჯოლავამ. მე-6 კურსის საუკეთესო სტუდენტად წელს ნინო ღუდუშაური დასახელდა. უნივერსიტეტის რექტორმა მას დავით ტვილდიანის სახელობის ჯილდო და ფულადი პრიზი გადასცა. საუკეთესო სტუდენტმა ნინო ღუდუშაურმა თავის კურსელ ბაბა საი კრიშნა ამბედკართან ერთად „ჰიპოკრატეს ფიცი“ წარმოთქვა. ფიცი დასტურია იმისა, რომ დავით ტვილდიანის სამედიცინო უნივერისტეტის სტუდენტები აცნობიერებენ საკუთარ პასუხისმგებლობას, არასოდეს დაივიწყებენ მას და მუდამ იზრუნებენ პაციენტების ჯანმრთელობაზე, რადგან სწორედ მათი პროფესია უკავშირდება ადამიანის სიცოცხლის გადარჩენას.
კურსდამთავრებულებს უნივერსიტეტის დეკანმა ქლბ-მა ნინო ბრეგვაძე-თაბაგარმა სამახსოვრო სერტიფიკატები გადასცა. ამის შემდგომ კურსდამთავრებულებმა ფიცს ხელი მოაწერეს და მათთვის განკუთვნილი ბრედირებული გულსამაგრები მიიღეს.
წინა წლის მსგავსად წელსაც დავით ტვილდიანის სამედიცინო უნივერსიტეტმა ლექტორთა 2 ნომინაცია წარადგინა და გამარჯვებულები სერთიფიკატებითა და ბრენდირებული გულსამაგრებით დააჯილდოვა. ნომინაციაში „2018 წლის გამოშვების რჩეული ლექტორი სწავლების ბაზისური ნაწილიდან“ გახდა ქლბ. ნინო ზავრაშვილი, ხოლო „2018 წლის გამოშვების რჩეული ლექტორი სწავლების კლინიკურ ნაწილიდან“ - ქლბ. თამარ კეზელი.
ცერემონიალის დასასრულს კი სტუდენტებმა ახალი ტრადიციის თანახმად ჰიმნი (Gaudeamus Igitur) შეასრულეს.
დავით ტვილდიანის სამედიცინო უნივერსიტეტი 2018 წლის კურსდამთავრებულებს წარმატებას და კარიერულ წინსვლას უსურვებს.