2016 წლის 23 ივლისს დავით ტვილდიანის სამედიცინო უნივერსიტეტმა მე-6 კურსის გამოსაშვები საღამო საქართველოს პარლამენტის ეროვნულ ბიბლიოთეკაში აღნიშნა. ცერემონიალს უძღვებოდნენ ამავე უნივერსიტეტის მე-3 კურსის სტუდენტები თათა რატიშვილი და გიორგი მშვილდაძე. კურსდამთავრებულებს უნივერსიტეტის რექტორმა ბნ-მა ლევან ტვილდიანმა და დეკანმა ქლბ. ნინო ბრეგვაძე-თაბაგარმა მიმართეს. ტრადიციულად წელსაც გამოვლინდა მე-6 კურსის საუკეთესო სტუდენტი, რომელიც წელს გახდა მარიამ წიქვაძე. უნივერსიტეტის რექტორმა მას დავით ტვილდიანის სახელობის ჯილდო და ფულადი პრიზი გადასცა. საუკეთესო სტუდენტმა მარიამ წიქვაძემ სნეია სელვარაჯთან ერთად „ჰიპოკრატეს ფიცი“ წარმოთქვა. ფიცი დასტურია იმისა, რომ დავით ტვილდიანის სამედიცინო უნივერისტეტის სტუდენტები აცნობიერებენ საკუთარ პასუხისმგებლობას, არასოდეს დაივიწყებენ მას და მუდამ იზრუნებენ პაციენტების ჯანმრთელობაზე, რადგან სწორედ მათი პროფესია უკავშირდება ადამიანის სიცოცხლის გადარჩენას. კურსდამთავრებულებს უნივერსიტეტის დეკანმა ქლბ.-მა ნინო ბრეგვაძე-თაბაგარმა სამახსოვრო სერტიფიკატები გადასცა. ამის შემდგომ კურსდამთავრებულებმა ფიცს ხელი მოაწერეს.
ეს თარიღი დავით ტვილდიანის სამედიცინო უნივერსიტეტისთვის მნიშვნელოვანი იყო თავისი სიახლეებითაც. წელს პირველად დავით ტვილდიანის სამედიცინო უნივერსიტეტმა 4 ახალი ნომინაცია წარადგინა და გამარჯვებულები სერთიფიკატებით დააჯილდოვა. ნომინაციაში „2016 წლის გამოშვების რჩეული ადმინისტრაციის წევრი“ ხმათა უმრავლესობით სერთიფიკატი გადაეცა დავით ტვილდიანის სამედიცინო უნივერსიტეტის კომპიუტერული სწავლებისა და შეფასების ცენტრის ხელმძღვანელი მაკა ტოგონიძე. „2016 წლის გამოშვების რჩეული ლექტორი სწავლების ბაზისური ნაწილიდან“ გახდა ქლბ. თამარ კეზელი. ხოლო „2016 წლის გამოშვების რჩეული ლექტორი სწავლების კლინიკურ ნაწილიდან“ გახდა ბნ. გია მუხაშავრია. ასევე წელს დაჯილდოვდა „2016 წლის გამოშვების რჩეული რჩევების ავტორი“. საუკეთესო რჩევებისა და დახმარებისთვის ჯილდო გადაეცა დავით ტვილდიანის სამედიცინო უნივერსიტეტის სასწავლო დეპარტამენტის ხელმძღვანელი ბნ. ნუგზარ ნარსიას.
საღამოს წამყვანებმა მოწვეულ სტუმრებს კიდევ ერთხელ შეახსენებს დავით ტვილდიანის საზოგადოებრივი საექთნო კოლეჯის გახსნასთან დაკავშირებული სიახლე. ამასთანავე ჩატარდა ქ. რუსთავში ახალი კამპუსის პროექტის პრეზენტაციაც. კამპუსი 2017 წლის შემოდგომაზე გაიხსნება და დაიწყებს უცხოელი სტუდენტების მიღებას.
დავით ტვილდიანის სამედიცინო უნივერსიტეტი 2016 წლის კურსდამთავრებულებს წარმატებას და კარიერულ წინსვლას უსურვებს.