საქართველოს კლინიცისტ ენდოკრინოლოგთა ასოციაციამ დავით ტვილდიანის სამედიცინო უნივერსიტეტის მხარდაჭერით 5-6 ოქტომბერს ტექნოპარკში ჩაატარა საერთაშორისო კონფერენცია “კლინიკური კურსი ენდოკრინოლოგიაში”. ქართველი ექიმების წინაშე აქტუალური სალექციო პროგრამით წარსდგნენ ამერიკის რეიტინგით N1 ჰოსპიტალის და ბოლო 30 წლის მანძილზე ენდოკრინოლოგიაში უწყვეტად ლიდერი კლინიკის ასოცირებული პროფესორები, მათ შორის მეიოს კლინიკის ენდოკრინოლოგიის რეზიდენტურის პროგრამის თანახელმძღვანელები ექიმი ნინა ნეთი და ექიმი კურტ კენელი, 2011 - 2013 წლებში ამერიკის ენდოკრინოლოგთა საზოგადოების (Endocrine Society) პრეზიდენტი ექიმი უილიამ იანგი, ამერიკის ძვლებისა და მინერალების კვლევითი საზოგადოების (American Society for Bone and Mineral Research) პრეზიდენტი ექიმი ბართ კლარკი, ამერიკის კლინიცისტ ენდოკრინოლოგთა ასოციაციის და ამერიკის ენდოკრინოლოგთა კოლეგიის საბჭოს წევრი ექიმი ირინა ბანკოსი.
მოწვეულ ლექტორებთან ერთად კონფერენციაში მონაწილეობას იღებდნენ ქართველი ექიმები, რომლებმაც წარადგინეს საინტერესო კლინიკურ შემთხვევები სემინარზე განხილული თემატიკის ფარგლებში.
კონფერენციის ფარგლებში დარგის მსოფლიო დონის ექსპერტებმა განიხილეს შემდეგი აქტუალური საკითხები ენდოკრინოლოგიაში: ჰიპოფიზის სიმსივნეები, პროლაქტინომა, კუშინგის სინდრომი, თირკმელზედა ჯირკვლის ინციდენტალომა, პირველადი ჰიპერალდოსტერონიზმი, ფეოქრომოციტომა, თირკმელზედა ჯირკვლის უკმარისობა, პარათირეოიდული ჯირკვლების დაავადებები, ოსტეოპოროზი.