11 თებერვალს, გაეროს ბავშვთა ფონდისა და იმუნიზაციისა და ვაქცინოლოგიის ასოციაციის (AIVA) მიერ USAID/Georgia-ს მხარდაჭერით ორგანიზებულ ვაქცინაციის კამპანიას დავით ტვილდიანის სამედიცინო უნივერსიტეტი შეუერთდა.
ურთიერთთანამშრომლობის მემორანდუმს ხელი მოაწერეს გაეროს ბავშვთა ფონდის წარმომადგენელმა საქართველოში, ღასან ხალილმა, დავით ტვილდიანის უნივერსიტეტის პრორექტორმა, სერგო თაბაგარმა და AIVA-ს წარმომადგენელმა, მარიამ ჯაშმა.
მემორანდუმების ფარგლებში სტუდენტებთან შედგება თანამშრომლობა კოვიდ-19-ის ვაქცინაციის შესახებ ინფორმაციის გასავრცელებლად.
კამპანია წარიმართება დევიზით: ''პანდემიას ასრულებ შენ!'' კამპანიის სამიზნე აუდიტორიაა შერჩეული რეგიონების ახალგაზრდები, რომლებსაც გააცნობენ ფაქტებზე დაფუძნებულ ინფორმაციას კოვიდ-19-ის, მისი პოტენციური გართულებებისა და პრევენციული ზომების შესახებ. განსაკუთრებული ყურადღება ვაქცინაციას დაეთმობა.